SÁÁ

Árið 1992 hóf SÁÁ að veita einstaklingum með spilavanda eða spilafíkn aðstoð og frá því í byrjun ársins 1996 hefur þjónustan verið aukin mjög og bætt. Hingað til lands hafa komið erlendir sérfræðingar til að þjálfa og fræða starfsfólk auk þess sem ráðgjafar SÁÁ hafa verið sendir til Bandaríkjanna í námsferðir.

Einkaviðtöl

Þeir sem telja sig vera í vanda vegna spilahegðunar sinnar geta fengið einkaviðtal við ráðgjafa á Göngudeild SÁÁ, Efstaleiti 7, í Reykjavík. Einnig er hægt að fá fjarviðtal sé þess óskað. Viðtalstíma má panta í síma 530-7600. Í einkaviðtali er staða fólks metin og fagmaður sker úr um hvernig best sé að glíma við vandann. Viðtali fylgja engar skuldbindingar og eru þau gjaldfrjáls.

Göngudeildarmeðferð við spilafíkn

Á göngudeild SÁÁ fer fram meðferð við spilafíkn undir stjórn ráðgjafa í fjárhættuspilateymi SÁÁ. Meðferðin er sett upp sem 45 mínútna fræðsla í formi fyrirlesturs og stuðningshópur í kjölfarið. Ekki er þörf á að skrá sig fyrirfram. Meðferðin er gjaldfrjáls.

Helgarnámskeið

SÁÁ býður öðru hverju upp á helgarnámskeið um spilafíkn, bæði í Reykjavík og á Akureyri. Námskeiðin eru auglýst sérstaklega og eru öllum opin. Markmið námskeiðanna er að auka skilning á spilafíkn og benda á leiðir til bata. Námskeiðin eru gjaldfrjáls.

Hugræn atferlismeðferð við spilafíkn

Á göngudeild SÁÁ er boðið upp á hugræna atferlismeðferð við spilafíkn hjá sálfræðingi. Spilaráðgjafi vísar einstaklingum til sálfræðings. Viðtölin eru gjaldfrjáls.

Þjónusta fyrir aðstandendur

SÁÁ býður aðstendendum upp á námskeið þar sem veitt er fræðsla og stuðningur. Þeir sem standa einstaklingum með spilafíkn nærri geta sótt sér ráðgjöf á Göngudeild SÁÁ í Reykjavík. Einkaviðtöl er hægt að panta í síma 530-7600.

Heimasíða SÁÁ

Til að fara á heimasíðu SÁÁ, smellið hér.

Sími Göngudeildar SÁÁ er 530 7600 og er hún til húsa að

Efstaleiti 7, Reykjavík.